Respetuhon sang House prosecution team ang bisan sin-o nga pilion sang Senado nga mangin presiding officer sang impeachment trial batok kay Vice President Sara Duterte.
Sa interview sang Bombo Radyo kay Lanao del Sur Representative Zia Alonto Adiong, spokesperson sang House prosecution panel, nagsiling ini nga may yara sang institusyonal nga independensya ang Senado kag isa ini ka internal nga butang nga ang impeachment court mismo ang magadesisyon.
Suno kay Adiong, magasunod sila sa bisan ano nga direktiba sang Senado kag batunon nila ang ano man nga desisyon nga pagahimuon sang upper chamber.
Ini ang kasunod sa pahayag ni Senator Panfilo “Ping” Lacson nga naghatag na sang inisyal nga paghando ang mga miyembro sang majority bloc nga papungkuon si Senator Francis “Chiz” Escudero bilang presiding officer sang impeachment court.
Kung matigayon ini, ini ang pagbalik ni Escudero bilang presiding officer sang impeachment trial batok kay Duterte. Ang una sini nga stint sang 2025 ang napuno sang kontrobersiya ilabi na sa interpretation sang “forthwith” sa idalom sang Article XI, Section 4 sang 1987 Constitution, kun maga-proceed bala gilayon sa trial.
Sang amo nga tion, gin-archive ang articles of impeachment.
Kahapon, sa interview sang Bombo Radyo Iloilo, nagpahayag man si Senator Kiko Pangilinan nga may suhestyon nga himuon si Senate President Sherwin Gatchalian bilang co-presiding officer ukon magabuslanay sila ni Escudero pagpanguna sa trial samtang si Pangilinan naman ang mangin impeachment manager.
Dugang pa ni Rep. Adiong, ginapakita lamang sini nga seryoso ang Senado sa gilayon nga pagpatigayon sang impeachment trial bangud maathag kag mainandamon nila nga ginakonsiderar kun abogado bala, Senate President, ukon iban pa nga mga butang ang angay nga manguna sa trial.
Ginpahayag man sang prosecution panel ang ila kalipay nga nasolbar na ang isyu sa pagpamuno sang Senado nga ila ginakabig bilang isa ka maayo nga panugod.
Matandaan nga sa special session sang Kongreso sang Myerkules sang pormal nga nagpungko si Gatchalian bilang Senate President matapos ang kinagamo kontra sa kampo ni former Senate President Alan Peter Cayetano.#
