Ginpangamuyuan kadungan sa “Mass for Peace and Accountability” sa EDSA Shrine ang pila sa mga myembro sang House prosecution panel nga magatindog sa impeachment trial batok kay Vice President Sara Duterte.

Lakip sa nagtambong sa misa amo sanday Mamamayang Liberal Party-list Rep. Leila de Lima, Manila 2nd District Rep. Joel Chua, Iloilo 3rd District Rep. Lorenz Defensor, kag Bicol-Saro Party-list Rep. Terry Ridon nga kabahin sang 11-member prosecution panel sa Senate impeachment trial batok kay Vice President Sara Duterte.

Ginpakilala sila ni Kiko Aquino Dee, ang co-convenor sang Tindig Pilipinas.

Yara man si Akbayan Party-list Rep. Percival Cendaña kag Tingog Party-list Rep. Jude Acidre.

Natabo ang misa isa ka adlaw antes ang pormal nga pag-convene sang Senado bilang impeachment court kun sa diin ginalauman nga magatambong man ang House prosecutors.

Ang amo nga misa ang organisado sang civil society groups, lakip na ang Tindig Pilipinas kag Clergy for Good Governance, agud nga manawagan sang public support para sa impeachment proceedings amo man para sa kamatuoran kag accountability.

Sa amo nga misa, ginpangamuyuan ang prosecutors agud nga ila mapanindugan ang ila katungdanan, indi mahadlok kag indi magpang-alang-alang, kag mapagwa kun ano ang kamatuoran.

Ang nagpanguna sa misa sa National Shrine of Mary, Queen of Peace nga kadungan man sang The Ascension of the Lord amo si Most Rev. Teodoro C. Bacani, D.D.

Nahibaluan nga magluwas sa ila, ang nagabug-os sa 11-member prosecution panel amo sanday Gerville “Jinky Bitrics” Reyes-Luistro (Batangas 2nd District); Jose Manuel “Chel” Diokno (Akbayan Party-list); Ysabel Maria Zamora (San Juan City); Lordan Suan (Cagayan de Oro City 1st District); Jonathan Keith Flores (Bukidnon 2nd District); Ramon Rodrigo “Rodge” Gutierrez (1-Rider Party-list); kag Arlene “Kaka” Bag-ao (Dinagat Islands, Lone District).#

RELATED ARTICLESMORE FROM AUTHOR