Pormal nga ginpakita ni House Speaker Bojie Dy sa publiko ang unod sang iya Statement of Assets, Liabilities, and Net Worth (SALN) kahapon, Oktubre 22.
Base sa record, naglab-ot sa P74.019 million ang kabug-usan nga net worth ni Dy matapos ibuhin ang iya mga utang ukon liabilities nga nagdangat sa P47.124 million.
Sa iya gindeklarar nga SALN, ginpahayag nga nagakantidad sang P32.53 million ang kabug-usan nga balor sang iya 12 ka agricultural properties kag apat ka residential lots kag balay.
Ginklaro nga 12 sa mga ini ang ginbakal halin pa sang 1990s tubtob 2000s, samtang apat naman ang ginpanubli.
Gindeklarar man sang bag-o nga lider sang Kamara ang iya cash holdings nga nagalab-ot sa P25.18 million kag mga investment nga nagabalor sang P29.6 million.
Lakip man sa personal nga mga asset ni Dy ang lima ka mga salakyan nga ginakabig nagabalor sang P11.34 million.
Kun pagatiponon ang tanan niya nga real estate kag personal assets, nagalab-ot ini sa kabug-usan nga P121.144 million.
Apang matapos ibuhin ang iya mga liabilities, nabilin ang net worth nga P74.019 million.
