ILOILO CITY- Nagpaathag si House Speaker Ferdinand Martin Romualdez sa involvement sa People’s Initiative for Modernization and Reform Action.
Sa iya statement, ginpahayag ni Romualdez nga gin-ako niya nga gin-approach siya sang mga kongresista halin sa People’s Initiative kalakip na si Mr. Noel Oñate.
Suno kay Romualdez, ini nga pagsinapol nga ginpatigayon sa iya townhouse ang para lamang sa open dialogue kag paghangop sa amo nga lihok sang pumuluyo.
Pahayag niya, bilang House Speaker, committeed ini nga itib-ong ang prinsipyo sang demokrasya kag magpatigayon sang diskusyon sa mga isyu nga may interes ang pumuluyo.
Apang nanindugan ang House Speaker nga ang papel niya indi isa ka nagpasimuno kundi nag-facilitate lamang kag nagserbe nga adviser kag indi agud pangunahan ang signature campaign.
Hugot naman sini nga ginpanginwala ang alegasyon sa iya involvement sa aktibidad nga nagasupak sa layi kaangay sang vote buying nga naangot sa amo nga initiative.
Matandaan nga gin-ako sang lead convenor sang People’s Initiative for Modernization and Reform Action (PIRMA) nga nagkoordinar sa ila si House Speaker Martin Romualdez agud makuha ang 3% sang signatures per congressional district para sa people’s initiative agud ilisan ang 1987 Constitution.
Sang gin-usisa ni Senator Marcos ang lead convenor sang PIRMA nga si Noel Oñate, iya gin-ako nga nagpangayo ini sang bulig sa House Speaker agud matigayon ang signature campaign.
Una diri, todo panginwala pa si Oñate, apang sa ulihi, nag-ako man ini sang ginpakita na sang senadora ang picture sa diin kaupod sini sanday Romualdez, Ako-Bicol Rep. Elizaldy Co, kag pila ka mga abogado sa diin may caption ini nga “People’s Initiative for Charter Change Staff Meeting”.
Ginpahayag ni Oñate nga siya ang nagduso nga magpatigayon sang pagsinapol, apang nakasugtan nga patigayunon na lang ini sa balay ni Romualdez.
Sang nag-ako na si Oñate, nagkinadlaw ang mga senador kag sa ulihi nagpasalamat si Senator Marcos bangud nakuha na sini ang iya ginapangayo nga sabat.
