𝗠𝗔𝗡𝗜𝗟𝗔 — Ginalantaw ni House Speaker Martin Romualdez nga posible nga malab-ot sang pungsod ang P29 tubtob P34 kada kilo nga bugas sa Agusto.
Ini ang ginpahayag ni Romualdez kasunod sang pagsinapol kaupod ang sanday Rowena Sadicon, ang founder kag lead convenor sang Philippine Rice Industry Stakeholders Movement (PRISM) kag ang co-founder sini nga si Orly Manuntag nga amo man ang spokesperson sang Grain Retailers Confederation of the Philippines (GRECON).
Suno kay Romualdez, nagpasalig duha ka organisasyon nga mapanubo ang presyo sang bugas ini kasunod man sang pag-implementar sang Executive Order 62 nga nagabuhin sang tariff rates sa imported rice halin 35% tubtob 15%.
Ginpahayag man ni Romualdez nga ang well milled rice ang posible mapanubuan sa P45 to 46 per kilo samtang ang premium rice ang posible mangin P47 to 48 per kilo sa masunod nga bulan antes paman malab-ot ang ideal price nga P29 to 34 per kilo sa bulan sang Agusto.
Nagpasalig naman ang natungdan nga ini nga tikang ang maimplementar sang retailers, wholesalers, importers, kag rice millers sa Pilpinas.
Gin-athag man sini nga indi isa ka drawing ang plano, bangud may gin-alokar na sila nga pondo kaupod ang National Irrigation Administration (NIA).
Nahibaluan nga Rice Competitiveness Enhancement Fund (RCEF) ang nagtanyag sang pondo sa idalum sang Rice Tariffication law nga nagabalor sang P22-billion agud ibulig sa mga mangunguma.
Padayon naman mabakal ang NFA rice halin sa local farmers nga nagabalor sang P29 to P31 per kilo.
