ILOILO CITY- Hugot nga ginapamatukan ni Senate Minority Leader Franklin Drilon ang tokhang style nga house-to-house search sang Department of Interior and Local Government sa pagpangita sang mga COVID-19 asymptomatics nga naga-home quarantine lang agud sayluhon sa mga isolation facilities.
Sa interview sang Bombo Radyo kay Senator Drilon, iya ginpahayag nga paglapas ini sa kasuguan ilabi na nga nasaad sa konstitusyon nga indi mahimo magsulod ang isa ka indibidwal ukon alagad sang kasuguan kun wala ini sang ginauyatan nga warrant.
Suno sa Ilonggo nga senador,wala man sang kredibilidad ang mga police para magpatigayon sang nasambit nga enforcement.
Gindugang man sang senador nga expired naman ang Bayanihan law gani wala sang nagakaigo nga legal nga basehan ang nasambit nga tikang nga ipatuman sang Department of Interior and Local Government.
Pahayag pa sang natungdan, mangin si Department of Health Secretary Franisco Duque III ang wala naman sang kredibilidad bangud sa nagabag-o bag-o sini nga pahayag rason nga wala na nagasalig ang publiko sa iya.
Gintawag man ni Drilon nga failure ang ginapatigayon nga contact tracing sa bilog nga pungsod.
