Padayon nga gina-ayam sang kapulisan ang suspek nga nagtiro-patay sa iya nga houseboy sa Valeria Extension, Brgy. Kauswagan, City Proper, Iloilo City.
Ang biktima amo si Jino Torco Allo, 21-anyos, kag residente sang Brgy. Alon, Valderama, Antique, samtang, ang suspek amo si Rayton Artuz Tinte, 50-anyos, kasado, kag residente sang 19B, Brgy. Kauswagan, City Proper, Iloilo City.
Sa interview sang Bombo Radyo kay PLt. Romelo Tabuyoc, Officer-In-Charge sang Iloilo City Police Station (ICPS) 1, iya ginpahayag nga sang ara ini sila sa garahe, gin-akigan sang suspek ang biktima bangud wala ini gapati kag nagapamurugso kun sugu-on.
Didto kag nagluntad ang pagbinaisay kag nag-gabot sang armas-luthang ang suspek kag gintiro ang biktima.
Nakaagum ini sang pilas sa wala nga parte sang iya dughan, tyan, kag alatrasan.
Gilayon ini nga gindala sa St. Paul’s Hospital apang gindeklara nga dead on arrival.
Posible naman nga magapangatubang sang kaso nga Homicide ang suspek.
