Ginaduso sa Sangguniang Panlalawigan nga butangan sang Purok Shelter ukon housing program ang probinsya sang Iloilo.
Itigana ini para sa mga pumuluyo nga yara sa high-risk areas nga “very vulnerable” sa kalamidad; halimbawa diri ang yara nagapuyo malapit sa baybay.
Sa interview sang Bombo Radyo kay Iloilo Fourth District Board Member Rolando Distura, chairman sang Committee on Disaster and Management sa Iloilo Provincial Board, iya ginpahayag nga iga-relocate ang ginabanta 10-15 ka mga pamilya nga ginakabig pinaka-prone sa kalamidad sa isa ka komunidad.
Sa inisyal nga proposal, ginduso man nga kun i-relocate na ang mga pumuluyo, ikonsiderar man nga magkasilingan sila gihapon sang naandan niya nga kasilingan sa ila una nga lugar.
Ini agud masigurado nga kilalahay na nga daan sila kag wala sang ginamo.
Suno kay Distura, kuhaon ang budget sa trust fund sa Provincial Disaster Risk Reduction and Management Office (PDRRMO).
May P100-million nga budget ini kada tuig tubtub sa tuig 2024.Kinahanglan man suno kay Distura nga magbuligay ang local government unit (LGU) kag ang barangay agud nga ma-realize ini nga proyekto. ##
