BANATE, ILOILO – Pagahimuon nga facility quarantine ang ginabanta nga 500 ka housing unit sa Banate, Iloilo.
Sa interview sang Bombo Radyo kay Mayor Carlos Cabangal Jr., iya ginpahayag nga ang nasambit nga lihok ang isa ka paagi sang Local Government Unit agud nga makabulig sa mga magapauli nga Locally Stranded Individual.
Suno kay Cabangal, ginpatinlu-an na kag ginpabutangan sang kisame ang housing units nga para kun tani sa mga relocatees agud nga matiniran sang returning residents.
Ginpahayag ni Cabangal nga sa subong, sa mga eskwelahan anay nagatinir ang mga Locally Stranded Individual apang sa tion nga bawion ini sang Department of Education, mas maayo nga may reserba ang Local Government Unit sang Banate.
Apisar sang problema sa kagutok sa facility quarantine, ginpahayag sang alkalde nga wala siya sang may mahimo kundi batunona ng mga magapauli nga residente kag pangitaan sang paagi ang nasambit nga problema.
Ang iya lang nga ginahingyo amo nga antes pa man maghalin sa Metro Manila, nagnegatibo na nga daan sa Reverse Transcription Polymerase Chain Reaction (RT-PCR) ang mga Locally Stranded Individuals.
