Sunod-sunod nga gin-atake sang United States military ang radar sites nga gina-operate sang Houthi rebels sa Yemen, ang grupo nga amo ang sa likod sa mga pagpang-atake sa mga barko nga nagalayag sa Red Sea.
Suno sa US Central Command, pito ka radars, isa ka drone, kag duha ka surface vessels nga wala sang crew ang ila nga ginpangguba sa sulod lamang sang 24 oras.
Ini nga radars suno sa militar amo ang ginagamit sang Houthis agud nga atakehon ang maritime vessels kag ibutang sa ital-ital ang commercial shipping.
Ini nga operasyon sang Estados Unidos ang kasunod sa natabo sa Greek-owned vessel sa Red Sea nga nagpangayo sang rescue bangud naguba gid ang engine room sini sang gin-atake sang rebelde. 21 sa 22 ka mga Pinoy ang na-rescue halin sa amo nga barko, samtang isa pa ang nagapabilin nga missing.
Suno sa Central Command, ini nga barko ang ginbuligan sang USS Philippine Sea kag partner forces sini, samtang ang Tutor naman nga ginbombahan sang Houthis ang yara gihapon sa Red Sea.
Nahibaluan nga halin sang Nobyembre 2023, masobra na 50 ka atake sa shipping ang nahimo sang Houthis kun sa diin tatlo man ka Pinoy ang napatay, isa ka vessel ang ila ginpalugdang, kag isa ka barko man ang ila nga ginsakop kag gindala sa Yemen kun sa diin may mga Pinoy man nga nakasakay.
