Nagpasalig ang lider sang rebelde nga Houthis nga untaton nila ang pagpang-atake sa mga barko sang Israel kag iban pa nga cargo ships sa Red Sea kun magpabilin kag matuman gid man ang ceasefire deal sa tunga sang Israel kag Hamas militants.
Suno kay Abdul Malik al-Houthi, sundon nila ang implementasyon sang agreement, apang kun may massacre nga himuon ang Israel sa tion nga ipatuman na ang ceasefire, magabalos man sila agud nga suportahan ang Palestine.
Ini nga militant group ang naka-base sa Yemen kag suportado man sang Iran.
Sang 2024, sunod-sunod ang ila pagpang-atake sa cargo ships sa Red Sea gamit ang rockets kag drones. Lakip sa mga nabiktima sini amo ang Filipino seafarers.
Bisan pa nga masalo sang Israel ang missiles kag drones sang Houthis, ang ila gid nga cargo attacks amo ang nagtuga sang krisis sa masako nga shipping corridor sa Red Sea.
Ini man ang rason kun ngaa nagalibot pa ang iban nga mga barko sa baylo nga maglabay sa amo nga teritoryo nga mas malapit kag mas mahapos kuntani para sa ila antes nag-ibwal ang gyera sa Middle East.
