ILOILO – Wala na sang otoridad pa ang Department of Education (DepEd) sa pagpatigayon sang imbestigasyon sa isa ka high school teacher nga ginapahayag nagpalantaw sang pornographic film sa duha ka section sang Grade 10 students sa Pili National High School, Ajuy, Iloilo.
Ini matapos nagpasa na sang iya resignation letter ang amo nga high school teacher, kag epektibo Nobyembre 27, indi na ini konektado sa nasambit nga pamunuan.
Sa interview sang Bombo Radyo kay Dr. Roel Bermejo, DepEd Iloilo schools division superintendent, iya ginpahayag nga wala na sa ila jurisdiction ang high school teacher.
Gin-athag man ni Bermejo nga ‘peace of mind’ ang ginatudlo rason sang high school teacher kon ngaa nag-resign ini sa pwesto, kag wala man sang nakit-an nga basehan ang ahensya kon ngaa punggan sini ang manunudlo sa iya desisyon sa pagresign.
Suno kay Bermejo, wala pa gani sang formal investigation sa amo nga insidente — wala pa napamatud-an kon guilty ini– apang kinamatarong sini ang iya desisyon.
Ginpahayag man ni Bermejo nga apisar indi na ‘administratively‘ maimplementar ang imbestigasyon sa manunudlo, naga-focus sila subong sa sitwasyon sang kabataan sa diin may yara sang assessment nga ginahimo ang mga opisyal agud madeterminar kon ano ang posible epekto sang sex films sa mga nakalantaw nga estudyante.
