Ginkumpirma sang Presidential Anti-Organized Crime Commission (PAOCC) ang identity sang ginakabig nga “boss sang tanan nga mga boss” sang Philippine Offshore Gaming Operators (POGOs) nga nagapatigayon sang criminal activities.
Sa isa ka interview, ginpamangkot si PAOCC Executive Director Gilbert Cruz kun si Huang Zhiyang ang pinaka-boss sang iligal nga mga POGOs kag ini ang ginkumpirma ni Cruz.
Si Zhiyang ang nakit-an nga may lima ka passports sa isa ka raid sa Clark, Pampanga.
Apang wala sini gintuad kun ini man ang nagbulig kay former Bamban, Tarlac mayor Alice Guo nga makapalagyo pagwa sang Pilipinas.
Suno kay Cruz, si Huang ang nagbulig kay Guo nga makakuha sang hotel accommodations sa Singapore.
Sang Martes, gintumod ni Senador Jinggoy Estrada nga si Huang Zhiyang ang posible nga dumuluong nga ginatumod ni Guo nga nagbulig sa iya nga magpalagyo.
Suno kay Estrada, nabatian niya nga ang amo nga indibidwal ang ginakabig nga “boss of all the bosses.”
Si Huang ang ginaalegar nga yara subong sa Taiwan.
