HONG KONG – Magapatigayon na naman sang hublag protesta ang mga tawo sa Hong Kong sa maabot nga dominggo.
Sa interview sang Bombo Radyo kay Bombo International Correspondent Merly Bunda direkta sa Hong Kong, iya ginpahayag nga maga-umpisa ang protesta sa Victoria Park padulong sa Admiralty.
May mga pulis naman nga nagapatigayon sang checkpoint sa nagkalain-lain nga bahin sang rehiyon.
Suno kay Bunda, padayon sa gihapon nga nagapanawagan ang Philippine Consulate sa mga Overseas Filipino Workers (OFW) nga likawan magpadulong sa mga area nga pagahiwatan sang hublag protesta kag likawan man ang pagpakigbahin agud nga mangin hilway sa katalagman.
Ginabanta nagdangat sa 150 ka round sang tear gas ang ginpangbuy-an sang mga otoridad sa hublag protesta sang tinalikdan nga adlaw; 79 ka mga protesters kag 22 ka mga police officers ang pilason; samtang 11 naman ang ginpangdakop sang mga otoridad.
