Makaalarma ang pagsaka sang numero sang mga patay sa Myanmar bangud sa nagalala nga mga hublag-protesta batok sa militar.
Suno kay Bombo International Correspondent Atty. Jobert Pahilga direkta sa Myanmar, nagdangat na sa masobra isa ka gatos ang numero sang mga ginbawian sang kabuhi kag ginabanta nagsaka na sa 2,700 ang numero sang mga gin-aresto halin sang ginpatuman ang kudeta.
Sang Dominggo, 38 ang reported nga napatay kag dinosena ang napilasan sa isa sa pinakamakamamatay nga adlaw sang kalakasan halin sang gin-angkon sang militar ang gahom sang Pebrero 1.
Sa protesta sa isa ka lugar sa Yangon, naggamit ang mga pulis sang live rounds, tear gas kag stun grenades agud atakehon ang mga nagaprotesta.
Ginapahayag nga nagpangluthang ang mga security forces halin sang pasado las 9:00 sa aga kag naglawig tubtob sa kagab-ihon.
Ginapahayag ginluthang man sang mga militar ang protesters nga nagmartsa sa Mandalay, Myingyan kag Aunglan.
Pila sa mga nagaprotesta sa Hlaing Tharyar sang Yangon City suno kay Pahilga ang armado sang kahoy kag kutsilyo.
Gindeklara man sang military junta ang martial law sa probinsya sang Yangon matapos gin-atake sang protesters ang pila ka negosyo sang Chinese.
Ini bangud suno kay Pahilga, nagapati ang protesters nga suportado sang mga Chinese ang militar.
Madamo suno kay Pahilga sang factory nga ginapanag-iyahan sang China ang lunsay ginsunog kag ginpangguba sang mga nagahublag-protesta.
Ginpahayag ni Atty. Pahilga nga samtang nagadugay, nangin tuman ka ‘madugo’ na ang mga nagakatabo sa pungsod Myanmar sa diin kada adlaw, madamo sang makalahangawa nga balita.
Sa subong suno sa natungdan, ginshutdown sang militar ang mobile internet connection sa bug-os nga pungsod kag gin-utod ang kuryente sa pila ka mga lugar.
