ILOILO CITY – Pasakaan sang kaso ang lalaki nga nagbunggo sa tatlo ka mga magpakaisa nga nagasakay sa motorsiklo sa Barangay Igtambo, San Miguel, Iloilo kun sa diin, isa ang ginbawian sang kabuhi.
Ang suspek amo si Jehzan Ortiz, 36, residente sang Poblacion Alimodian, Iloilo.
Ang napatay amo si Jumir Maxim Calabio, 24, residente sang Barangay Lanag, Leon, Iloilo.
Pilason naman ang driver sang motorsiklo nga si River John Calabio, 20 anyos kag isa pa ka angkas sini nga si Jimmy Calabio, 22.
Sa interview sang Bombo Radyo kay Police Staff Sergeant Art Arturo, imbestigador sa San Miguel Municipal Police Station, iya ginpahayag nga kaso nga reckless imprudence resulting to homicide kag reckless imprudence resulting to physical injuries and damage to properties ang ipasaka batuk sa suspek.
Una diri, nagikan sa banwa sang San Miguel ang mga biktima kag pauli na sa banwa sang Leon sang natabo ang insidente.
Sang yara na ang mga ini sa Barangay Igtambo, San Miguel, hinali lang sila nga ginbunggu-an sang pick up nga nagasunod sa ila kag ginamaneho sang hubog nga driver.
Bangud sang impact sang pagkabunggo, nagtabog ang mga biktima sa ginasakyan nga motorsiklo.
Nagpalagyo pa ang suspek apang ginlagas sang San Miguel Municipal Police Station sa bulig sang iban pa nga mga police units.
Nadakpan sa ila balay sa Alimodian ang suspek.
Sa subong, preso na ini sa San Miguel Municipal Police Station.
