Wala sa gihapon nakit-an ang isa ka lalaki matapos ini nga naglumpat sa taytay sang Brgy. Lanag, Santa Barbara, Iloilo samtang nagalaslas man ang Bagyo Opong.
Ini amo si alyas Wally, 33-anyos, isa ka laborer, kag residente man sang amo nga banwa.
Sa imbestigasyon sang mga otoridad, yara sa impluwensya sang makahulubog nga ilimnon ang biktima sang natabo ang insidente.
Sa interview sang Bombo Radyo kay Jameson Dela Cruz, responder sang Municipal Disaster Risk Reduction and Management Office (MDRRMO), iya ginapahayag nga nag-umpisa ang search and rescue operation halin 11:00 kaina sang aga kag temporaryo nga gin-untat sang kasisidmon.
Sang natabo ang insidente, nagdangat sa ginabanta nga siyam ka tapak ang kataason sang lebel sang tubig sa suba kag mabaskog pa ang daludo sang tubig.
Base sa mga nakasaksi, nagtamwa pa ang ulo sang lalaki sang makapila sang beses apang makaligad lang ang pila ka segundo, wala na ini nakit-an pa.
Naglab-ot ang search operation pati sa Agutayan River, New Road Cabugao Norte River, sa suba sa Angel’s Point Subdivision, kag sa area sang Zone 6, Sta. Barbara.
MASAMI NAGALUMPAT SA SUBA
Sa separado nga interview sa tiyo nga si Rodrigo Heria, ginpahayag sini nga masami gid man nga nagalumpat sa suba ang biktima para maligo.
Gindugang sini nga nakahibalo man ini maglangoy.
Wala sang kaugalingon nga pamilya ang biktima kag iya lamang nga amay nga isa ka bedridden ang iya nga kaupod sa ila balay.
Magapadayon ang search and rescue operation sang mga otoridad bwas sang aga, Septyembre 27.
Nahibaluan nga kaina, Septyembre 26, ginpasaka sa wind signal numbers 1&2 ang pila ka mga porsyon sang Iloilo bangud sa Bagyo Opong.#
(with reports from Bombo Krylle Melliza)
