Patay ang isa ka lalaki matapos nga nalumos kahapon nga adlaw sa isa ka Dam sa Brgy. Misi, Lambunao, Iloilo.
Ini matapos nga naglangoy ang 26-anyos nga biktima apisar nga yara ini sa impluwensya sang makahulubog nga ilimnon.
Sa interview sang Bombo Radyo kay Bong Alebosa, isa sa mga rescuer sa nasambit nga insidente, iya ginpahayag nga wala man nagkulang sa mga bantay ukon rescue team kag opisyal sang banwa bangud preparado man ang mga ini sa tion sang insidente.
Apang suno man kay Alebosa, wala man sila nakakita ukon nakabati sang nagapangayo sang bulig nga indibidwal, rason nga wala man sila nakaresponde.
Paathag man niya, wala man man gilayon nga matukiban sang mismo nga mga kaupdanan sang biktima kag pamilya sini nga wala na magbutwa ang ila nga himata matapos ini nga nagsalum sang ginabulubanta na nga masobra 30 minutos tubtob isa na ka oras.
Nasapwan ang bangkay nga yara na sa madalom nga bahin sang dam kag wala na gid sang kabuhi.
Nahibaluan nga gintunguhaan pa sang pamilya kag rescuers nga dal-on sa ospital ang biktima, apang gindeklarar na ini nga dead on arrival.
