ILOILO CITY- Nagasalalampaw nga kaso ang pending subong sa National Police Commission batok sa hubog nga pulis nga nagpangluthang sa iya kasilingan sa Brgy. Poblacion West, Oton, Iloilo.
Ang suspek amo si PCpl Marvin Seasol, assigned sa Arevalo Police Station sa Iloilo City samtang ang biktima naman amo ang 55-anyos nga si Normando Estrebor.
Sa interview sang Bombo Radyo kay NAPOLCOM Region -6 Director Atty. Joseph Celis, iya ginpahayag nga may tatlo ka mga kaso pa nga ginfile batok kay Seasol kag dismissal ang recommendation.
Suno kay Celis, isa sa sini nga kaso ang may kaangtanan man sa iya pagpangastigo kag pagpang-abusar sa ila lugar sa Oton.
Samtang, ginpakamalaot man sang NAPOLCOM director ang amo nga akto sang pulis nga nagamantsa sa imahe sang Philippine National Police.
Nagpaandam man ini sa mga kapulisan nga panumdumon ang ila katungdanan bilang law enforcers kag likawan ang mga pagpang-atake nga personal ang motibo kag wala naangot sa trabaho bilang police officers.
