ILOILO CITY – Limitado na lamang ang hulag sang mga rebelde nga grupo sa isla sang Panay.
Sa interview sang Bombo Radyo kay Brigadier General Michael Samson, commanding officer sang 301st Infantry Brigade, iya ginpahayag nga sa mga maligwin na lamang nga lugar sa Panay nagakatabo ang mga encounters kun sa diin, mabudlay para sa mga otoridad.
Apang sa pihak sini suno kay Samson, target nila nga maubos ang tanan nga rebelde sa isla.
Suno pa sa iya, sa syudad sang Iloilo, posible nga may yara sang nagapadulong nga myembro sang rebelde sang grupo apang nagapabugnaw ukon nagalikaw lamang kag indi makabig nga combatant.
Dugang pa ni Samson, wala man sila nalipay sa tion nga may yara sang nagakapatay sa encounter apang pahayag niya, resulta na ini sang pagrebelde sang grupo.
Nagpasalig man ang natungdan nga nagapadayon ang mga programa sang gobyerno para sa mga gusto nga mag-surrender.
Isa sa mga programa sang gobyerno amo Enhanced Comprehensive Local Integration Program ukon (E-CLIP).
Sa sini nga programa, makabaton sang P15,000 ang rebel returnee bilang immediate financial assistance kag livelihood assistance nga P50,000.
