ILOILO CITY- Ginpatpat kag ginhatagan kasanagan sang isa ka human rights lawyer ang pila ka isyu sang legalidad sa operasyon sang Philippine National Police sa compound sang Kingdom of Jesus Christ sa Davao City agud i-serbe ang alias warrant batok kay Pastor Apollo Quiboloy kag sa iban pa nga akusado sa kaso nga child abuse, sexual abuse, kag qualified trafficking.
Sa interview sang Bombo Radyo kay Atty. Jobert Pahilga, iya ginpahayag nga kinamatarung kag obligasyon sang kapulisan nga iserbe ang warrant kay Quiboloy sa kondisyon nga ginagiyahan sang konstitusyon kag pagsulundan ang implementasyon sa pagserbe sang warrant.
Suno kay Pahilga, wala man naggamit sang excessive force ang kapulisan apisar nga kapin 2,000 ka mga personnel ang nagpakigbahin sa operasyon bangud nga pagpaniguro lamang ini sa posible pag-atubang nila sa tuman man ka damo nga myembro sang kingdom nga yara sa compound.
Ginpahayag sang abogado, sa bahin ni Quiboloy, obligasyon man sini nga magsungka kun matuod gid man nga wala ini sang sala kag atubangon na lang sa korte ang mga kaso batok sa iya kag pamatud-an kun indi gid man ini guilty.
Dugang pa niya, bangud sa pagpakatig-a ni Quiboloy, ang nagagwa nga makaluluoy amo ang iya mga supporters nga daw kaangay sang mga panagang agud protektahan ang pastor.
Sa bahin naman sang mga supporters ni Qiuboloy nga nagtipon agud mag-rally kag bantayan ang hulag sang mga kapulisan, indi man ini makabig nga obstruction of justice bangud nga wala man ang mga ini direkta nga nagapugong sa mga pulis sa ila pagpangita kay Quiboloy sa compound.
Sa isyu naman sang pagtinir sang kapulisan sa premises sang compound nga nagsukat na duha ka adlaw humalin sang Sabado sang kaagahon, iya ginpahayag nga legal ini bangud man sa ginauyatan nila nga alias warrant.
Suno kay Pahilga, wala sang expiration ang alias warrant kag valid ini bisan ano man nga oras kag sa bisan diin nga lugar sa Pilipinas agud dakpon ang subject sa warrant nga si Quiboloy.
