Hugot nga nagapati ang isa ka human rights lawyer nga mismo ang mga opisyal sang gobyerno sang Pilipinas ang dapat magatindog agud pangapinan ang soberanya sang pungsod, ilabi na sa agawan sang teritoryo sa West Philippine Sea (WPS).
Sa interview sang Bombo Radyo kay Atty. Jobert Pahilga, isa ka human rights lawyer, iya ginpahayag nga talawit kag daw pagsurrender ang ginabuhat sang pila ka senador sa pagpangapin sa China batok sa pag-claim sang Pilipinas sa WPS.
Ginpunto ni Pahilga ang mga kaangay pag-apin nga pahayag ni Senator Rodante Marcoleta batok sa Chinese embassy, nga nagpakamalaot sang pila ka lideres sang pungsod, lakip na si Philippine Coast Guard (PCG) spokesperson Commodore Jay Tarriela.
Dugang pa sini, makaalarma ang pagbais ni Marcoleta sa iya kaupdanan sa Senado nahanungod sa agawan sang teritoryo sa WPS, nga kaangay nagapabor sa China, bisan pa nga siya mismo ang isa sa mga lideres sang pungsod nga dapat nagasuporta sa kinamatarong sang Pilipinas sa iya teritoryo.
Paathag ni Pahilga nga sala gid ang mga pahayag ni Marcoleta kag indi ini ang buluhaton sang isa ka matuod nga Pilipino.
.){kind=link}