Hunyo 8, gindeklarar nga ‘Rene Clert Baterbonia Day’ sa Talacogon, Agusan del Sur

Nagpasar sang resolusyon ang Municipality of Talacogon sa Agusan del Sur agud ideklarar ang Hunyo 8 kada tuig bilang “Rene Clert ‘Bobet’ N. Baterbonia Day.”

Ini ang kabahin sang pagkilala sang Sangguniang Bayan sang Talacogon sa legasiya nga ginbilin ni Rene kag ang bugal nga ginbilin sini sa iya banwa paagi sa malip-ot apang matahum nga mga tinuig sini sa paghampang sang basketball.

Hunyo 8, 2026 sang napatay si Rene kag ang isa ka Nigerian player nga si Divine Adili matapos nga nalumos samtang nagapatigayon sang “team building activity” ang men’s basketball team sang Ateneo de Manila University sa Aurora.

Subong nga aga, ginpatigayon ang isa ka Requiem Mass para kay Rene antes ini gindul-ong sa Talacogon Memorial Park sa Barangay Labnig sa amo man nga banwa kun sa diin siya nagdaku.

Sa misa, makit-an nga tuman ang pagtalangison sang iya nga iloy kag mga utod kasunod sang temprano sini nga pagpaalam matapos nga nalumos sa “team building activity” sang Ateneo De Manila University men’s basketball team sa Aurora sadtong Hunyo 8.

Makit-an man ang mga medalya kag tropeo nga natipon ni Rene sa iya malip-ot lang apang matahum nga mga tinuig sa paghampang sang basketball.

Suksok naman sang iya mga taga-suporta ang puti nga jersey nga may naka-imprinta nga DAVRAA nga amo ang rehiyon nga gintiglawas ni Rene kag ginpangunahan agud magkampyon sa Palarong Pambansa 2025.

Sa lubong subong nga adlaw, mangin representative sang Ateneo ang Vice President for Basic Education nga si Fr Joaquin Jose Mari Sumpaico III SJ.

Maga-upod man ang pila ka opisyal sang Ateneo de Manila kag Ateneo de Davao Senior High School kun sa diin nag-eskwela si Baterbonia antes ini nagpadulong sa Manila agud nga lab-uton kuntani ang iya handum nga makahampang sa UAAP sa idalom sang Blue Eagles.