ILOILO CITY – Tuman nga huol nga natuga sang depektibo nga Ungka Flyover ang nagtulod sa pila ka mga estudyante nga mag-upod sa condemnation rally.
Ini matapos nga nagpasalig ang kontraktor sang Ungka Flyover nga mahimo nalang nga 25 minutos ang pag-biyahe pakadto sa Iloilo Airport apang, nagpabilin na lamang ini nga pagpasalig bangud nadugangan pa ang inoras nga kinahanglan agwantahon bangud sa nakit-an nga vertical displacement sa flyover.
Sa interview sang Bombo Radyo kay Arlie Bosque, nga nagikan sa sektor sang kabataan kag estudyante, iya ginpahayag nga nagakahangawa ini sa kaangay man nga mga estudyante nga naga-agwanta nga magbugtaw sang kaagahon agud indi maipit sa pagpugok sang trapiko.
Suno kay Bosque, isa ini ka maathag nga halimbawa sang perwisyo nga natuga sang flyover rason nga kinahanglan gid sang sabat.
Nagapanindugan ang natungdan sa panawagan nga gilayon nga magpatigayon sang imbestigasyon sa proyekto agud nga mahibaluan ang mga indibidwal kag ahensya nga yara sa likod sang palpak nga proyekto.
