Hustisya, ginasinggitan para sa ginpatay nga 'people's doctor'; misa patigayunon sa bilog nga pungsod

ILOILO CITY – Ginpakamalaot sang West Visayas State University College of Medicine sa Lapaz Iloilo City, ang natabo nga pagluthang-patay sa ila alumnus nga si Dr. Dreyfuss Perlas sa Purok-4, Barangay Maranding, Kapatagan, Lanao del Norte.
Sa exclusive interview sang Bombo Radyo Iloilo kay Dr. Joselito Villaruz, dean sang WVSU College of Medicine, ginpahayag sini nga ginakasubo nila ang natabo nga pagpatay kay Dr. Perlas.
Suno kay Villaruz, estudyante sini sadto si Perlas kag isa ini ka matutom nga bata kag nakit-an na sini sang una sa personalidad sang biktima nga may pag-ulikid ini sa mga pigado nga pasyente.
Ginpahayag naman ni Dr. Marcos Bito-onon, presidente sang Alumni Association sang WVSU College of Medicine, nagalaum sila nga mahatagan sang hustisya ang natabo kay Dr. Perlas.
Ang 31-anyos nga doktor ang tumandok sang Poblacion, Batan, Aklan.
Siya ang nag-graduate sa UP High School sa Iloilo, nagtapos sang kolehiyo sa UP Los Banos sa kurso nga BS Biology, kag nagkuha sang medisina sa WVSU College of Medicine.
Nagikan sa medical mission kag papuli na sa iya gina-arkilahan nga balay ang biktima, sang gintiro sang mga armado nga lalaki nga nakasakay sa pribado nga salakyan sa Purok-4, Barangay Maranding, Kapatagan, Lanao del Norte.
May igo ini sa likod nga naglapos sa iya baga matapos ginluthang sang .45 caliber pistol nga amo ang gintunaan sang iya kamatayon.
Ginapahayag nga may nakaaway ini nga pasyente nga amo subong ang isa sa mga ginalantaw nga rason sang krimen.
Nakabaton sang death threats ang biktima antes ini ginpatay.
Nahibaluan nga ginpakamaayo ni Dr. Perlas nga magpabilin sa Lanao del Norte apisar natapos na ang iya misyon bilang “Doctor to the Barrios” agud magbulig sa mga pigado nga pasyente.
Magahiwat naman sang misa sa nagkalain-lain nga bahin sang pungsod sa maabot nga adlaw sang Domingo para kay Dr. Perlas.