ILOILO CITY – Hustisya ang ginasinggitan sang himata, abyan kag kakilala sang mag-asawa nga school principal kag manunudlo nga nabunggu-an patay sang Mazda MX5 sports car sa Sen. Benigno Aquino Avenue, Mandurriao, Iloilo City sang damlag lang.
Halin sa St. Therese Chapel, ginsaylo kaina sang hapon sa Lapaz 2 Elementary School ang haya sang mag-asawa nga sanday Joe Marie kag Alnie Dinah Osano para sa public viewing kag buwas na man nga adlaw, pagadal-on sa ila balay Leofel Subd., Ticud, Lapaz, Iloilo City.
Gindugukan sang mga manunudlo, estudyante kag mga ginikanan ang haya sang mag-asawa sa mini gymnasium sang nasambit nga eskwelahan.
Sa interview sang Bombo Radyo kay Dr. Dionne Baldoza Arbis, district supervisor sa Lapaz, iya ginpahayag nga matandos nga sahi sang manunudlo ang mag-asawa nga Osano.
Ginpahayag man ni Dr. Arbis nga si Sir Osano ang masami nga nagalahog kag masinadnyahon nga sahi sang tawo.
Magluwas nga magka-upod sa trabaho, ginpahayag ni Dr. Arbis nga malapit sa iya ang duha bangud nga himata niya si Ma’am Osano.
Ginkakibot naman ni Nanita Sumadic Socuelan, ang natabo sa mag-asawa nga Osano.
Ginpahayag ni Socuelan nga kaupod nga manunudlo sang mga biktima, nga malapit sa mga kabataan ang duha sa diin ang iya tatlo ka anak ang na-estudyante pa sang mag-asawa nga Osano.
Ginpahayag man ni Socuelan nga magluwas nga mabinuligon, masami man nga magkaupod ang duha ka mga biktima.
Isa ka adlaw bag-o natabo ang aksidente, ginpahayag ni Socuelan nga iya pa nga naka-upod si Ma’am Osano kag wala gid niya ginlauman nga may matabo nga mala-in sa mag-asawa.
Samtang, wala napunggan sang security guard sa Lapaz 2 Elementary School, ang iya luha samtang ginadumdum ang maayo nga hinimu-an sang mag-asawa nga Osano.
Suno sa guard nga nagpahinago lang sang pangalan, si Sir Osano ang naghatag sang trabaho sa ila nga mag-asawa.
Ginpahayag man sang natungdan nga kun tani, mahatagan sang hustisya ang kamatayon sang mga biktima.
