SAN JOSE, ANTIQUE – Hustisya ang ginahandum sang mga biktima sa shootout sa Brgy. Atabay, San Jose, Antique.
Sa interview sang Bombo Radyo kay Jason Checa, utod sang napatay nga si Ervin James Checa, iya ginpahayag nga indi mabaton sang iya pamilya ang natabo sa biktima.
Suno kay Checa, magluwas nga nadulaan siya sang utod, nagapabilin pa sa hospital ang isa pa gid niya ka utod nga si Stephen.
Ginpahayag ni Checa nga indi niya lubos nga kilala ang suspek nga si Venom Dio Mangilaya nga napilasan man matapos nagpalagyo sa otoridad.
Ginpahibalo lang sang ila kasilingan suno kay Checa nga may yara sang natabo nga shootout sa computer shop nga ginatrabahu-an sang iya utod.
Sang nag-abot sila sang iya iloy sa crime scene, wala na sang may nabilin nga tawo kag ang motorsiklo na lang sang iya utod nga si Ervin James ang ila nakita nga naparking sa saguwa.
Ila nga ginpadulungan sa hospital ang iya utod kag ila nakumpirma nga napilasan si Stephen apang ulihi na lang nila nahibalu-an nga ginbawi-an gid sang kabuhi si Ervin James.
May kaangtanan diri, agpamalibad naman nga maghatag sang pahayag ang pamilya sang suspek.
