GUIMARAS – Hustiya ang ginasinggit sang pamilya ni Anthony William Landicho, ang 36-anyos nga lalaki nga ginapahayag gin-abduct anay sa Rizal St. Iloilo City Proper antes gin-buy bust sang Regional Drug Enforcement Unit (RDEU) sa Sta. Filomena, Arevalo, Iloilo City sang Martes, Marso 3.
Sa interview sang Bombo Radyo sa tiya ni Anthony sa Nueva Valencia, Guimaras, iya ginpahayag nga duha ka butang ang luyag athagon sang mga himata ni Anthony sa subong.
Ang una suno sa natungdan amo ang pamangkot kun diin na nagkadto ang masobra P20,000 nga dala ni Anthony sang natabo ang insidente.
Suno sa tiya, ang rason kun ngaa yara si Anthony sa Iloilo sang Martes amo nga nagpamakal ini sang kinahanglanon nga grocery para sa hamyang sang iya amay nga napatay.
Nagproseso man ini sang nagakaigu nga dokumento para sa iya amay.
Suno pa sa tiya, matapos ang ginpatigayon nga buybust operation, wala na na-recover ang P20,000 nga kwarta kag ang grocery ni Anthony — magluwas lang sa tres pesos, tiger-printed shoulder bag, kag dokumento nga amo ang nauli sa ila nga magpamilya.
Ang ikaduha nga luyag athagon sang natungdan amo nga kun ano ang ginhimo sang Regional Drug Enforcement Unit kay Anthony sa sulod sang masobra duha ka oras.
Nahibaluan nga ginabanta ‘las singko tubtob ‘las sais sang Martes sang hapon sang ginpwersa nga ipasakay si Anthony sa salakyan sang ginapahayag mga miyembro sang RDEU; samtang, las otso y medya naman ginpatigayon ang buybust operation sa Arevalo.
‘GINKASTIGO?’
Gin-athag sang tiya ni Anthony nga sang ginbisitahan nila ini sa Arevalo Police Station, nagakurog man ini sa gihapon sa kakulba.
Suno sa tiya, gin-ako ni Anthony nga nagasakit ang iya sulok-sulok bangud ginkastigo siya sang mga tawo nga amo ang ‘nag-abduct’ sa iya.
Dugang pa sang tiya, ginpahayag ni Anthony nga yara sa pito ka tawo ang yara sa puti nga salakyan sang natabo ang insidente.
‘MGA LIHOK SANG PAMILYA’
Plano naman sang pamilya nga magpasaka sang nagakaigu nga kaso kun indi pa mahatag ang hustisya sa subong.
Suno sa tiya, nagdoble pa ang ila problema bangud magluwas nga ginahaya pa ang bangkay sang iya utod nga amo ang amay ni Anthony, natabo man ang nasambit na nga abduction kag buybust operation.
Ginpahayag sang natungdan nga si Anthony kuntani ang nagapanguna sa pagproseso sang mga kinahanglanon sa haya sang iya amay kag amo man ang nagabantay sa iya bedridden na nga iloy.
