ILOILO CITY – Madamo sang pangayuon kay Presidente Rodrigo Duterte ang pamilya ni Joanna Daniela Demafelis, ang Ilongga OFW nga ginpatay sang iya amo sa Kuwait.
Sa interview sang Bombo Radyo Iloilo, ginpahayag sang iloy ni Joanna nga si Eva Demafelis, nga sa pagpadulong sang presidente sa haya ni Joanna, una nga pangayuon sini nga mahatagan gilayon sang hustisya ang kamatayon sang iya bata.
Suno pa kay Mrs. Demafelis, hingyuon man niya sa presidente nga buligan sila nga matapos ang balay nga ginapatindog ni Joanna para kuntani sa ila.
Dugang pa sini, mangayo man sila sang bulig agud magawad ang duta nga ila naprenda sa balor nga P300,000.
Ini ang isa sa mga rason suno kay Mrs. Demafiles nga nagtrabaho sa iban nga pungsod si Joanna.
Apang karon nga wala na si Joanna, magahingyo man ang iloy sini kay Pres. Duterte nga hatagan sila sang palangabuhian.