ILOILO CITY – Dapat nga himuon sang kapulisan ang ila katungdanan bilang law-enforcement body kag dapat sundon ang tanan nga protocol sa pagpatigayon sang ila operasyon.
Ini ang pahayag ni Alyas Nene, ang utod ni Anthony William Landicho, ang lalaki nga ginapahayag gin-abduct anay sa Rizal St. Iloilo City Proper antes gin-buy bust sang Regional Drug Enforcement Unit sa Sta. Filomena, Arevalo, Iloilo City sang Martes.
Si Alyas Nene ang yara subong sa United Kingdom kag amo ang nagpadala sang kwarta kay Anthony sa pagproseso sang kinahanglanon para sa hamyang sang bangkay sang ila amay sa Nueva Valencia, Guimaras.
Matandaan nga una na nga ginpahayag sang pamilya nga nadula ang P20,000 nga bitbit ni Anthony matapos ang ginpatigayon nga buybust operation.
Dismayado si Alyas Nene bangud tubtob subong, wala sila nakahibalo kun ano ang natabo sa iya utod sa sulod sang masobra duha ka oras — ang ginutlo sa tunga sang ginpatigayon nga abduction (ginabanta ‘las singko tubtob ‘las sais sang Martes sang hapon) kag sa buybust operation sa Arevalo (‘las otso y medya sa gab-i).
Suno sa natungdan, wala siya nagapati nga matuod nga subject sang buybust operation ang iya utod bangud ngaa pa suno sa iya nga kinahanglan dal-on si Anthony sa Arevalo kun mahimo man lang ini nga ma-rekisa sa kun diin ini nagatindog sa Rizal St.,Iloilo City Proper.
“NAG-‘GRADUATE’ NA SA BISYO”
Nagpanindugan naman si Alyas Nene nga wala na nagagamit ukon nagaduso sang iligal nga droga si Anthony.
Aminado ang natungdan nga drug surrenderee si Anthony apang natapos na sini ang first phase sang rehabilitation kag sa pagkamatuod, natalana kuntani ini nga maga-gradwar sa rehabilitation program sang Community Anti-Drug Coalitions of America subong nga Mierkules, Marso 4, sa Nueva Valencia, Guimaras.
Suno kay Alyas Nene, natapos na ang ini nga bahin sang bisyo sang iya magulang kag nagapati siya nga inosente si Anthony.
Pahayag pa sang natungdan, labi nga imposible ang alegasyon sang kapulisan nga nagabaligya sang iligal nga droga si Anthony bangud kun panumdumon, P3,000 lang ang buybust money sa Arevalo samtang P20,000 naman ang orihinal nga kwarta ni Anthony — indi hamak nga mas daku ipaanggid sa P3,000.
