Kadungan sang nagasaka nga tension sa pulitika sa Pilipinas partikular na sa tunga sang mga Marcos kag Duterte, nagpahanumdom si President Ferdinand Marcos, Jr. sa militar nga magpabilin nga tampad sa ila misyon nga proteksyunan ang mga Pilipino kag indi magpatiplang sa gahod sang mga pulitiko.
Sa iya pag-atubang sa mga opisyal kag tropa sa Southern Luzon Command sa Camp Guillermo Nakar sa Lucena City, Quezon, ginpahayag sang chief executive nga dapat nga naka-focus gid ang pwersa-militar sang Pilipinas.
Amo ini ang sabat sang presidente matapos nga nagpaguwa man sang statement si former President Rodrigo Duterte sang nagligad nga gab-i nga nagapanawagan sa militar nga tadlungon ang guba nga pangginahum ni Marcos.
Apang pahayag ni Marcos, indi niya trabaho nga magpangita sang kontra ukon atubangon ang mga wala sang pulos nga bagay. Ginplastar sini nga ang iya trabaho amo nga paayuhon ang kabuhi sang mga Pilipino.
“Huwag kayong nalilinlang sa mga nangyayari. Let’s stay focused. Pare-pareho tayo. Ako, ganoon ang isip, pagka maraming maingay ang nangyayari, iniisip ko lagi: ano ba talaga trabaho ko? Trabaho ko ba’y makipag-away diyan? Trabaho ko makipagdebate diyan sa mga walang kwentang bagay?” suno sa president.
“Hindi. Ang trabaho ko ay pagandahin ang Pilipinas.”
Gindugang man sini nga kun may pagpang-duha-duha man subong sa pinsar sang militar, dapat nila balikan ang ila misyon nga amo ang paghatag sang proteksyon sa mga tawo kag sa bilog nga republika sang Pilipinas.
“Let’s keep that mission clear in our mind. And kung nadi-distract tayo – siyempre maraming sigaw, maraming ingay – ‘pag nadi-distract tayo at sabi papaano na ito? Madali iyan, madali ang sagot diyan: Ano ba ang mission ko? Iyon, ‘yun ang tutuparin ko,” dugang ni Marcos.
Kaupod sang presidente nga nagbisita sa tropa amo sanday Defense Secretary Gilbert Teodoro kag Armed Forces of the Philippines (AFP) chief Gen. Romeo Brawner Jr.
Una na nga gin-athag sang AFP nga indi na kinahanglan ang loyalty check sa ila tropa bangud nagapabilin sila nga tampad sa chain of command.
Ang isyu sa loyalty check ang sa tunga sang kahangawa sang posible matabo nga kudeta bangud sa away nanday President Marcos kag anay ka-tandem sini nga si Vice President Sara Duterte.#
