ILOILO CITY – Ginbuyagyag sang isa ka high value individual nga durugista nga sa sulod sang New Bilibid Prison nagakatabo ang transaction sang iligal nga droga nga ginabaligya niya sa pila ka bahin sang syudad sang Iloilo.
Ang durugista amo si Jypsy Almores, 19, residente sang Barangay Bakhaw, Mandurriao, Iloilo City.
Nakuha sa iya ang ginabanta 55 grams sang shabu nga may standard drug price nga P374, 000.
Sa interview sang Bombo Radyo kay Police Captain Roque Gemino, team leader sang Iloilo City Drug Enforcement Unit, iya ginpahayag nga gin-ako mismo sang subject nga ang droga ang ginakuha niya sa koneksiyon ni Alyas Toto sa sulod sang national penitentiary nga kilala man sang iya amay nga si Danilo Almores nga subong preso sa Bureau of Jail Management and Penology.
Si Danilo ang nakuhaan man sang P 476, 000 nga balor sang iligal nga droga sang isa man ka team sang Iloilo City Drug Enforcement Unit sang bulan sang Abril.
Antes nadakpan sang Abril, si Danilo ang naka-agi naman preso sa New Bilibid Prison bangud man sa kaso may kaangtanan sa iligal nga droga.
Nagapati ang kapulisan nga ang mga durugista sa Bakhaw kag sa kaiping nga mga barangay ang nagakuha man sang droga sa ginakuhaan ni Almores.
Samtang, ang bata nga Almores ang nagabaligya sang droga sa kaiping nga mga barangay kag ang transaction ang ginapatigayon sa social media kag ang bayad ang ginapa-agi sa isa ka electronic payment service.
