ILOILO CITY – Nagapangita sang dugang nga doktor ang Iloilo City Government para nga magbulig sa pag-atipan sa mga Dengue patients nga yara sa hydration center sa La Paz, Iloilo City.
Sa interview sang Bombo Radyo kay Iloilo City Mayor Jerry Treñas, iya ginpahayag nga functional na ang hydration center nga nahamtang sa ika-tatlo nga panalgan sang La Paz Maternity Clinic.
Suno kay Treñas, ang nasambit nga hydration clinic ang makasarang nga magbaton sang indi magnubo sa 14 ka mga pasyente.
Ginpahayag ni Treñas nga bastante ang nurses kag medical technologist apang mas makapaayo kun madugangan ang mga doktor ilabi na ang Pediatrician.
Sa mga interesado, mahimo nga magpakig-angot sa Iloilo City Hall para sa dugang nga detalye.
May kaangtanan naman sa nagataas nga kaso sang Dengue Hemorrhagic Fever, ginpahayag sang natungdan nga padayon ang pagpanglimpyo sa tagsa kabarangay amo man ang pagpatigayon sang Oplan Hawan sa mga dalanon sa syudad sang Iloilo.
Sa maabot nga martes, ginpahayag sang alkalde nga may igapanghatag ang Iloilo City Government nga dugang nga sprayer kag chemicals sa tagsa ka barangay kag eskwelahan agud nga gamiton sa pagpatay sang lamok nga nagadala sang balati-an.
