ILOILO CITY – “I am willing to bet my life.”
Ini ang itaya sang alkalde sang syudad sang Iloilo agud mapamatud-an sa mga pumuluyo nga personal niya nga kwarta ang iya nga gingamit sa pagpatigayon sang survey sa syudad sang Iloilo nga nagatakos sang COVID-19 awareness sang mga pumuluyo.
Sa interview sang Bombo Radyo kay Treñas, iya ginpahayag nga wala sang gingasto nga pondo halin sa Iloilo City Government kag ini ang sarang mapamatud-an sa mga dokumento sang City Accounting Office kag City Treasurer’s Office.
Ginpahayag sang alkalde nga ‘honest-to-goodness’ ang survey nga ginpatigayon sang iya ginapahayag professional survey group nga Random Access Consultants Incorporated (RACI).
“The survey was an honest-to-goodness survey para makuha gid naton ang sentiments sang aton nga mga pumulyo.”
Bangud sa mga alegasyon nga ginapulitika niya ang survey kag ginapahayag may nakabutang nga mga pangalan sang possible candidates sa survey form, una na ginpahayag sang alkalde nga natural lang sa iya bilang political person nga magpatigayon sang political surveys agud mahibaluan ang luyag kag indi luyag sang mga tawo sa iya administrasyon.
Una naman nga nagdepensa si Treñas sa Bombo Radyo nga gindala na lang niya ang COVID-19 awareness sa iya nga survey kag maayo man suno sa iya bangud may nakuha nga mga scientific data nga mahimo magamit sa COVID-19 response sang Iloilo City Government.
“Ang survey kun ginabayran mo na ya sang personal, pagusto ka na ya kun ano ang imo nga survey,” pahayag sang alkalde.
