ILOILO CITY – Ginpasalig sang Department of Interior and Local Government (DILG) nga wala sang dapat kahangaw-an sa luyag ni Presidente Rodrigo Duterte nga mag-appoint sang barangay officials kag ipaiway ang barangay election nga natalana sa Oktubre subong nga tuig.
Ginpahayag sa Bombo Radyo ni DILG Undersecretary Jesus Vicente Hinlo nga kun madayon ang plano sang Presidente, indi maghalin sa pulitiko ang rekomendasyon para sa i-appoint nga mga barangay officials.
Suno kay Hinlo, plano ni Presidente Duterte nga magpakig-angot sa mga non-governmental organizations (NGOs).
Ang NGO ang magarekomenda kun sin-o ang dapat i-appoint nga opisyal sa isa ka barangay.
Liwat naman gindepensahan sang DILG ang pagpaiway sang eleksyon nga suno kay Hinlo, kabahin lang sang demokrasya.
Suno sa opisyal, kabahin ini sang kagustuhan ni Duterte nga limpyuhan ang mga barangay sa iligal nga droga.
Sa bahin sang Kongreso, ginpahayag ni Iloilo 5th District Rep. Raul Tupas nga mas mapadali ang pagpasar sang hagna sa pagpaiway sang eleksyon sa barangay, kun i-certify urgent sang Presidente.