Gina-ako ni Presidente Rodrigo Duterte ang responsibilidad sa iya nga drug war campaign nga gina-imbestigahan na subong sang International Criminal Court (ICC).
Suno kay Presidente Duterte, gina-nerbyos si Senator Ronald “Bato” Dela Rosa bangud kalakip siya sa Oplan Tokhang apang ginasiguro niya nga wala sang iban nga maulamid kag siya lang ang dapat nga mapreso.
Si Dela Rosa amo sadto ang pinuno sang Philippine National Police sang nag-umpisa ang drug war sang 2016.
Apang pahayag sang presidente, nagakadapat nga lunsay Filipino lang ang makapamatbat sa iya — halin sa korte, sa husgado tubtob sa prosecutor.
Nahibaluan nga makapila na ka beses nga ginpahayag sang Duterte administration nga wala sang hurisdiksyon ang ICC sa Pilipinas bangud ginbasura na ni Presidente Duterte ang pungsod nagikan sa treaty nga nagtukod sang tribunal sang 2018.
Apang santu sa ICC, yara sa gihapon sa ila nga hurisdiksyon ang Pilipinas umpisa sang nagpungko si Duterte bilang presidente sang Hulyo 2016 tubtob sang Marso 2019 sa diin nangin epektibo ang pag-withdraw sang Pilipinas gikan sa Rome Statute.
Dugang pa sang chief executive, napaslawan ang ICC nga lantawon ang mga law enforcers kag ordinaryo nga mga Filipinos nga ginpamatay sang mga durugista.
Sa ginpaguwa nga data sang gobyerno, nagdangat sa 6,181 ka tawo ang napatay sa masobra 200,000 nga mga anti-drug operations nga ginpatigayon humalin sang Hulyo 2016.
Samtang sa court papers sang ICC prosecutors, ginabanta yara sa 12,000 tubtob 30,000 ang mga tawo nga nagkalamatay.
