Nagpasalamat si Chief Presidential Legal Counsel Juan Ponce Enrile matapos nagguwa ang desisyon sang Sandiganbayan nga i-acquit ini kag ang iban pa nga akusado nga sanday Atty. Jessica “Gigi” Reyes kag Janet Napoles sa kaso nga plunder nga naangot sa pork barrel scam.
Suno sa 100-anyos nga anay senador, sang una pa lang, nagapati siya nga indi siya madutlan sa kaso bangud wala man siya sang ginhimo nga sala.
Ginsiling sini nga kasunod sang desisyon sang Sandiganbayan, kuntani konsensyahon man ang mga tawo nga nag-file sang kaso batok sa ila.
“Pinasasalamatan ko ‘yung mga mahistrado for rendering justice to all of us… I knew all along that I will be acquitted, because we have not done anything… I hope the people who filed those cases against us will examine their conscience,” kabahin sang pahayag ni Enrile.
10 ka tuig ang gindalagan sang amo nga P172-million plunder case.
Suno sa Sandiganbayan, gin-acquit ang tatlo bangud napalpak ang prosecution nga mapamatud-an nga guilty sila “beyond reasonable doubt.”
Magapabilin naman sa presuhan si Napoles ukon ang ginbansagan nga “Pork Barrel Queen” bangud may duha pa ini ka plunder convictions nga naangot gihapon sa pork barrel scam.
Nagpahayag naman ang pamilya ni Enrile paagi sa iya anak nga si Chief Executive Officer Katrina Ponce Enrile sang Cagayan Economic Zone Authority, nga malipayon sila nga natapos na ang isa ka dekada nga kaso kag nahatag sa ila ang hustisya.
Ginsiling sini nga may lamud-pamulitika ang amo nga kaso nga gin-file anay sa iya amay sang 2013.
Ini nga desisyon sang Sandiganbayan Special Third Division ang kasunod sang pag-grant sa demurrer to evidence nga gin-file sang kampo ni Enrile.
Ini nga motion ang gina-file kun nagapanindugan ang defendant nga ang mga ebidensya sang prosecution batok sa akusado ang kulang agud nga matum-ok ini sa kaso.
Matandaan nga sang 2018, ginpamatbatan man si Napoles nga guilty sa plunder sa separado nga kaso sa ginaalegar misuse sa pork barrel fund ni Senator Ramon Revilla, Jr.
Ang iban pa nga kaso nga naangot sa pork barrel scam amo ang na-file batok kay Revilla kag Jinggoy Estrada apang pareho sila nga na-acquit kag subong pareho man nga senador.#
