Wala pa sang gana si Los Angeles Lakers superstar LeBron James nga buy-an ang bola sa National Basketball Association (NBA) apisar nakuha niya ang maragtason nga kadalag-an bilang all-time leading scorer sa liga.
Ini matapos nalapawan sang 19-time NBA All-Star ang rekord ni Hall of Famer Kareem Abdul-Jabbar sa all-time scoring list paagi sa iya 38-point haul sa hampang sang Lakers batok sa Oklahoma City Thunder.
Gintapos ni James ang amo nga hampang paagi sa 38,390 career regular season points, mas mataas sang tatlo sa 38,387 nga tally ni Abdul-Jabbar, ang record nga amo ang nagapanguna sa lista sang all-time leading scorers halin sang 1984.
Suno sa 38-anyos nga basketball star, ginalauman niya nga magatinir pa siya sa iya nga career sa amo nga liga sa sulod sang duha ka tuig.
Ginpahayag man sini nga marasangan pa niya nga mag-compete sa championships kag motivated pa siya nga himuon ini.
“I know I can play a couple more years. The way I’m feeling, the way my body’s been reacting to me through this season. I know I can play a couple more years — it’s all about my mind. If my mind is still into it, if I’m still motivated to go out and try to compete for championships, I feel like I can still do that,” suno sa basketball superstar.
Sang ginpamangkot kun ang iya bag-o nga achievement ang nagakahulugan nga siya ang “greatest player in NBA history”, sabat ni James, “I’ll let everybody else decide who that is… But it’s great barber shop talk.”
Ginbaha naman sang pagpanginbulahan si James halin kay United States President Joe Biden, big basketball stars kaangay kanday Stephen Curry kag Kevin Durant, celebrities kaangay ni Rihanna, kag iban pa nga kabahin sang National Basketball Association community. ##
