ILOILO CITY- Ginpanginwala sang barangay officials sang Calumpang, Molo, Iloilo City ang naggwa nga impormasyon nga naglagaw pa samtang ginapaidalom sa home quarantine ang duha ka Locally Stranded Individuals gikan sa Cebu kag nagpauli sa nasambit nga lugar.
Sa interview sang Bombo Radyo kay Punong Barangay Roberto Niño, iya ginpahayag nga sang nag-abot sang Hunyo 17 ang duha ka Locally Stranded Individual, gilayon ang mga ini nga ginpaidalom sa home quarantine, ginpaidalom sa rapid test kag ginkuhaan sang swab sample para sa real-time polymerase chain reaction (RT-PCR) test.
Suno kay Niño, nag-negatibo sa rapid test ang duha apang nagpositibo sa (RT-PCR) test sang ginpagwa ang resulta kahapon, Hunyo 23 sa diin gilayon man ang mga ini nga gindala sa Jubilee Hall agud ipaidalom sa facility quarantine.
Hugot man nga ginpanginwala ni Niño nga ipaidalom sa lockdown ang bilog nga Calumpang.
