Ginakasubo sang pamilya sang tatlo ka mga menor de edad nga mga kabataan nga lunsay mga lalaki matapos nga ginsunog sang ila kaugalingon nga iloy sa Bulacan.
Ginkilala ang iloy kay alyas Joyce kag nakapamana kay Kim Aspero nga residente sang Brgy. Managupaya, Banate, Iloilo, kag apo sang anay punong barangay sang nasambit nga lugar.
Sa interview sang Bombo Radyo kay Lea Allado Silahis, tiya sang amay sang mga kabataan, iya ginpahayag nga grabi gid ang iya kaluoy sa naabtan sang iya mga apo.
Suno kay Silahis, ginkadenahan sang iloy ang duha niya ka mga kabataan sa sulod sang comfort room kag ginsaraduhan.
Samtang, ginbubuan naman sang iloy ang hiligdaan sang iya agot nga bata sang gas kag ginsindutan, kun sa diin nasunog gid ang bilog nila nga puluy-an.
Dugang pa ni Silahis, napatay gilayon ang ikaduha kag ikatatlo nga anak, samtang nadala pa sa hospital ang subang nga bata kun sa diin nakahambal pa sang tinaga nga “I love you Dady” sa iya amay bag-o pa ini ginbawian sang kabuhi.
Ginpakigbahin man ni Silahis nga nakabati siya sadto sang estorya nga ang pamilya sang babaye ang may mga deperensya sa paminsaron, kun sa diin isa man ini sa ginalantaw sang pamilya nga rason sa ginhimo nga krimen.
