Determinado si Miss Iloilo Binibini 2020 Karen Laurrie Mendoza nga makabulig agud makilala ang Iloilo City ukon ang City of Love sa national beauty pageants.
Si Mendoza amo ang official candidate sang Iloilo City sa Binibining Pilipinas 2020-2021.
Siya man ang isa sa ‘recognized beauties among the new faces’ sa amo nga national pageant.
Sa exclusive intereview sang Bombo Radyo kay Mendoza, iya ginpahayag nga kaangay ni Miss Universe Philippines 2020 Rabiya Mateo, plano man niya nga tapuson ang madugay na nga tion nga wala nakasulod ang Iloilo City sa top spots sa pageant industry.
Madamo ang nagapamangkot kun pressured bala si Mendoza matapos nakuha ni Rabiya ang korona sa iya nga kompetisyon sang Oktubre 25. Sabat naman ni Mendoza: “Actually, even before, pressured na gid ko because wearing the sash of Iloilo is a pressure itself. But I’ve told myself, if mag-join ka man lang sang pageant and your purpose is not to win, why would you join in the first place? Amo na ang akon gid nga goal — to do my best and make Iloilo proud.”
Suno sa Ilongga beauty queen nga tumandok sang Concepcion, Iloilo, nagdaku siya bilang “independent” kag madamo siya sang naagyan nga mahimo man maka-inspire sa iban nga mga tawo. Ini suno sa iya ang iya edge sa Binibining Pilipinas nga posible patigayunon sa Abril 2021.
“I’ve always described myself as a warrior and damo na gid ko naagyan in life and I could inspire a lot of people through my learnings. I hate studying, I mean, like, with books… but I love learning from people. And…ako, Karen Laurrie… I’ve known myself, I’ve lived with myself alone, I’ve known myself too much and I always have a vision and I always turn my vision into reality. Amo gid na guro ang edge ko,” pahayag ni Mendoza.
Ini man ang rason suno sa iya kun ngaa wala siya nagasapak kun may yara sang bashers.
“Since college ko, independent na ko. My Mom, since four years old ko, ara na siya sa iban nga bansa. Basically, I’ve been molding myself to be a warrior — to know and how to fight life. If there’s a basher online, I really won’t mind about it because I know myself better. The only criticism that matters is from my Mom, my family, and my closest friends.”
Isa man ka mental health advocate si Mendoza. May yara siya sang social media page nga Project Sunrise nga amo ang iya designed platform agud makabulig sa iban ilabi na bangud limitado ang hulag sang mga tawo subong nga madamo ang restrictions dala sang COVID-19 pandemic.
Luyag ni Mendoza nga mabuligan ang mga tawo nga may yara sang mental health problems. “Don’t enclose yourself in the four corners of your room. It’s okay if you don’t wash your dishes. It’s okay if pirme ka lang nagatulog but at some point, stand up and do things nga consistent and it’s going to make you happier and if indi na gid kaya, we can go to the doctor. Indi ta ni dapat ikahuya kay they have been trained for that and damo gid tawo nga mabulig,” mensahe sang beauty queen.
Matandaan nga originally scheduled ang Bb Pilipinas pageant sang bulan sang Mayo apang gin-postpone bangud sang COVID-19 pandemic.
May mga na-post na nga mga laragway ang organization sang mga kandidata sa ila nga national costume apang wala pa sang pinal nga anunsyo kun san-o ang pageant date.
Sa iya national costume, gindayaw man si Mendoza bangud sang iya bulalakaw-inspired costume nga gin-design ni Tata Pinuela.
Sa subong, nagatutok si Mendoza sa iya pagpanghanda para sa pageant.
