Ginpasugtan na sang COVID-19 Inter-Agency Task Force for the Management of Emerging Infectious Diseases Resolutions (IATF) ang pagpatigayon sang limited face-to-face classes tubtob sa 50 percent capacity sa tanan nga degree programs sa mga buluthuan nga yara sa Alert Level 2 areas ukon mga lugar nga napaidalom sa modified general community quarantine (MGCQ).
Suno kay Commission on Higher Education Chairperson Prospero de Vera, yari ang tatlo ka mga kondisyon nga gin-set sang IATF:
- Nagakadapat nga bakunado batok sa COVID-19 ang mga estudyante, faculty kag school employees;
- Mataas ang vaccination rate sang lugar kag aprubado sang local government unit; kag
- Napreparar kag natsikyar sang maayo ang facilities ukon buluthuan
“Na-approve po sa IATF kahapon, that [Alert Level 2] is equivalent of MGCQ (modified general community quarantine) areas. Most probably, that would probably happen in areas where vaccination rate is already high like maybe in Metro Manila universities.”
Suno kay de Vera, sandig sa data halin sa higher education institutions, nagdangat na sa 73 percent ang nationwide vaccination rate sang faculty members kag mga empleyado.
Samtang yara pa lang sa 30 percent ang vaccination rate sang mga estudyante bangud ulihe ang mga ini nalakip sa listahan sang mga makabaton sang COVID-19 vaccines.
Nahibaluan nga sang tinalikdan nga Septyembre, gin-aprubahan ni Presidente Rodrigo Duterte ang pagpatigayon sang limited face-to-face classes sa mga degree program nga engineering and technology, hospitality management, hotel, and restaurant management, tourism management, marine engineering, kag marine transportations sa higher education institutions sa mga lugar nga napaidalom sa MGCQ.
