Ginaduso sang government pandemic task force sa Commission on Elections (COMELEC) nga panglagson kag pang-dagdagan sang penalidad ang mga kandidato kag political parties nga nagalapas sa health protocols sa tion sang pagpangampanya.
Suno kay Secretary Karlo Alexi Nograles, co-chairman sang Inter-Agency Task Force for the Management of Emerging Infectious Diseases (IATF-EID) kag amo man ang acting Malacañang spokesman, may mandato ang COMELEC nga pang-disiplinahon ang mga kandidato nga nagapatigayon sang dalagku nga campaign rally nga nahimo na nga superspreader events.
Una na nga nagpaandam ang IATF nga ang paghiwat sang daku nga mga political rallies ang posible tunaan sang pagtimbuok liwat sang kaso sang Covid-19 sa pungsod.
Labi ini nga naistoryahan bangud sa nakit-an nga pagdinaguso sang publiko sang dungan nga ginpatigayon sang mga presidential candidates kag sang ila runningmates kag senatorial slate ang ila nga proclamation rallies sang nagligad nga Martes nga amo ang opisyal nga pag-umpisa sang campaign period para sa nationally-elected nga mga posisyon.
Suno kay Nograles, tanan nga campaign activities ang natuon sa hurisdiksyon kag pagbantay sang COMELEC.
Ang IATF suno kay Nograles amo ang may katungdanan ukon hurisdiksyon sa non-election-related activities.
Matandaan nga lakip sa guidelines sang COMELEC para sa pagpangampanya amo ang mandatory nga pagsuksok sang face mask, wala sang sudlanay sa balay sang botante, wala sang pagkupo-kupo kag pagbeso-beso, kag wala man gina-engganyo ang pagpangamusta ukon handshakes amo man ang pag-selfie sa mga kandidato.
