GUIMARAS – Ginhimo sang Guimaras Provincial Government ang tanan agud nga makabulig sa mga nagpauli nga Overseas Filipino Workers.
Ini ang gin-athag ni Guimaras Vice Gov. John Edward Gando kasunod sang reklamo sang mga Overseas Filipino Workers nga kasubong nga ginapasa-pasahan sila bangud sa kakulang sang proper coordination sa tunga sang ahensya sang gobyerno.
Sa interview sang Bombo Radyo kay Gando, iya ginpahayag nga antes pa man ang repatriation kahapon, Mayo 25, nagpahibalo ang Inter-Agency Task Force tuhoy sa mangin katungdanan sang Guimaras Provincial Government.
Suno kay Gando, ang katungdanan lamang sang Guimaras Provincial Government amo ang paghatag sang transportasyon padulong sa quarantine facility sang 17 ka Overseas Filipino Workers nga tumandok sang nasambit nga probinsya.
Ang Overseas Workers Welfare Administration suno kay Gando amo ang may katungdanan sa akomodasyon kag ang natabo kagab-i ang isa ka hitabo nga indi na sakop sang kontrol sang Guimaras Provincial Government.
Nahibalu-an nga kagab-i, makapila ka bes nga ginbalibaran sang hotel kag motel management ang mga Overseas Filipino Workers bangud sa kakulang sang proper coordination.
May kaangtanan naman sa proseso sang pagpauli sa Guimaras, ginpahayag ni Gando nga sa syudad sang Iloilo anay magatinir ang Overseas Filipino Workers tubtub nga wala pa ang resulta sang COVID-19 test.
Kun magnegatibo na ang resulta, pagadal-on naman sa quarantine facility sang Guimaras ang Overseas Filipino Workers agud padayunon ang 14-day quarantine kag liwat naman nga ipaidalom sa COVID-19 test.
Ang mga magnegatibo naman suno kay Gando ang pahanugutan na nga makapauli sa ila balay.
May kaangtanan naman sa ginapahayag indi pag-intindihanay sa tunga nanday Mayor Eugene Reyes kag Gov. Samuel Gumarin, ginpahayag sang Bise Gobernador nga ginakabig ini nga dynamics of politics.
Wala na naghatag sang komento si Gando apang ang maathag lang suno sa iya amo nga nagatrabaho sang maayo ang tanan nga opisyal sang Guimaras.
