ILOILO CITY- Nagapanawagan ang National Meat Inspection Service (NMIS) sa mga Local Government Units sa Western Visayas nga mag- angkon sang accredited nga slaughterhouse agud nga mapabakod pa ang local meat inspection system sa rehiyon 6.
Ini bangud nga sa Western Visayas, ang slaughterhouse sa Ibajay, Aklan gid lang ang accredited sang NMIS.
Sa interview sang Bombo Radyo kay NMIS Regional Technical Director Randy Lontoc,apisar halos tanan nga LGU ang may kaugalingon nga slaughterhouse, kinahanglan nga mag- improve ang mga equipment kag pasilidad sini agud nga makaproduce sang matinlo nga karne.
Suno kay Lontoc, ang NMIS mismo ang naga- accredit sa mga slaughterhouses santo sa standards kag physical structure sang slaughterhouse agud nga malikawan ang contamination.
Kinahanglan man nga ginatudluan ang mga butcher sang husto kag matinlo nga pamaagi sang pag-ihaw.
Pahayag ni Lontoc, may programa ang NMIS nga ginatawag nga Quality Assurance Program kun sa diin gina-monitor ang performance sang mga pasilidad pati na ang butcher kag mga tawo sa sulod sang slaughterhouse kun nagasunod sa pagsulundan agud mahibaluan kag masiguro nga safe kag matinlo ang karne nga nagaguwa.
Dugang sang natungdan, kun accredited na ang slaughterhouse, pila sa benepisyo sini amo ang pag-improve sang ma- generate nga income kag development pa gid sa meat industry.
Apang suno sa iya, isa sa mga rason kun ngaa wala nagapa- accredit ang mga slaughterhouse amo ang kakulang sang pondo sang LGU.
