THAILAND – Indi tanan nga mga lugar sa Thailand ang apektado sang nagakatabo nga hublag protesta.
Nahibaluan nga luyag sang mga raliyesta nga sipaon sa pwesto si Prime Minister Prayut Chan-o-cha.
Kasunod sini, nagpatuman sang state of emergency ang Thailand agud tapuson ang tatlo ka bulan nga pagprotesta sang mga estudyante nga nagapanawagan sang pagresign sa pwesto sang ila Prime Minister.
Sa nasambit nga mando, ginadumilian ang pagtipon sang masobra lima ka tawo kag pagpagwa sang mga balita kag online messages nga makaguba sa national security.
Si Prayuth ang nagpungko sang tuig 2014 matapos ang coup d’etat.
Luyag sang mga protesters nga magpahalin na si Prayuth sa pwesto kag tapuson na ang isa ka dekada nga pagpamigos sa mga supporters kag opponents sang gobyerno.
Magluwas sini, luyag man nila nga bag-uhon ang konstitusyon kag panubuan ang gahom nga ginahatag kay King Maha Vajiralongkorn.
Sa interview sang Bombo Radyo kay Rey Michael Quemado, tumandok sang Hamtic, Antique kag nagatrabaho subong bilang elementary teacher sa Lampang Thailand, iya ginpahayag nga normal man ang sitwasyon sa subong sa ila lugar.
Apang sa capital sang Thailand nga Bangkok, linibo sa gihapon ang nagapatigayon sang hublag protesta.
Suno kay Quemando, nagapabilin naman nga malinong sa Lampang sa diin malayo ini sa Bangkok.
