Wala nadala sa ginhatag nga executive clemency ni President Ferdinand ”Bongbong” Marcos Jr. ang mga masunod pa nga mga desisyon sa iban pa nga kaso nga ginapangatubang ni former Iloilo City Mayor Jed Patrick Mabilog.
Sa interview sang Bombo Radyo kay Atty. Noel Palomado, Bombo Abogado, iya ginpahayag nga ang executive clemency nga ginhatag kay Mabilog ang kaangot lang sa desisyon sang Office of the Ombudsman bangud sa “dishonesty” bangud sa iya ginapahayag tago nga manggad nga gin-file ni anay Iloilo Provincial Administrator Manuel ‘Boy’ Mejorada.
Suno kay Palomado, ang paghatag sang executive clemency kay Mabilog ang ginbase sa iya mayo nga pagdumala, mga awards nga nabaton kag pagkilala nga nabaton sang Iloilo City sa idalom sang iya pagpamuno.
Bangud sa executive clemency, mahimo na nga magpadalagan si Mabilog sa anuman nga posisyon sa gobyerno.
Apang sa pihak sini, nagapangatubang sa gihapon si Mabilog sang kaso nga graft sa Sandiganbayan nga ginpasaka sa ila ni anay Iloilo City Councilor Plaridel Nava II sang Office of the Ombudsman sang 2023.
Kaangot ini sa ila kahilabtanan sa pag-award sang isa ka kontrata sang gobyerno sa isa ka firm nga ginapahayag may kaangtanan sa ila.
Sang Setyembre, nagpyansa si Mabilog kaangot sa kaso sini nga graft.
Kun anuman ang mangin desisyon sini, gin-athag sang abogado nga indi na ini sakop sang executive clemency.
