ILOILO CITY- Ginhatagan sang konsiderasyon ang pila ka mga istruktura nga nagasablag sa mga dalanon kag sidewalk sa ginpatigayon nga clearing operation sang Iloilo City Government sa pila ka mga barangay sa Syudad sang Iloilo.
Ini kasunod sang mando ni Presidente Rodrigo Duterte nga hawanan ang mga dalanon sa bilog nga pungsod gikan sa mga obstructions.
Sa interview sang Bombo Radyo kay Mr. Jeck Conlu, pinuno sang Public Safety and Transportation Management Office, iya ginpahayag nga sa ginpatigayon nga Oplan Hawan, may mga struktura nga wala anay ginpangguba.
Suno sa iya, may mga dalagko nga istruktura nga kun bakbakun sang backhoe, masakop ang ila nga balay kag maguba man.
Ginpahayag ni Conlu nga ila nalang ginhatagan sang notice kag extension ang tag-iya sang nasambit nga mga struktura agud magmato-mato nga i-demolish ang mga ini.
Nahibaluan nga una nga ginpatigayon ang Oplan Hawan sa Aguinaldo, Lapaz kag Alalasan kag Jalandoni Estate sa Lapuz.
