ILOILO CITY- Baliskad naman sa panan- awan sang iban, positibo ang isa ka Afghan national para sa panibag-o sa Afghanistan sa idalom sang pagpamuno sang Taliban.
Sa interview sang Bombo Radyo kay Sayed Sadaat, isa ka Afghan accountant, iya ginpahayag nga may mga promisa nga ginpangbuy-an ang Taliban nga sa iya pagpati, may madul-ong man nga kaayuhan kon tumanon lamang ini.
Suno kay Sadaat, hatagan niya sang tsansa nga pamatud-an sang Taliban nga masarangan nila nga magpamuno kag tumanon ang pasalig nga respetuhon kag hatagan sang kinamatarung ang kababainhan, mga religious minorities, kag ang pinakaimportante nga indi pagtugutan ang mga terorista nga grupo nga himuon ng hulukmungan ang Afghanistan agud planuhan ang mga pagpang-atake sa iban nga pungsod.
Dugang niya, indi nila kinahanglan nga magbiya kag nagapati siya nga ang mga Afghans nga nag-evacuate ang napilitan lang nga magbiya bangud sa pagpasilabot kag pagpwersa sang iban nga pungsod.
