ILOILO CITY – May mga residente nga nagareklamo nga wala nakabaton sang food packs sa Brgy. Sto. Niño Sur, Arevalo, Iloilo City.
Ginpahayag ni Victoriano Trespeces nga pasado 5:00 kaina sang hapon, wala pa sila nakabaton sang food packs.
Mahimo suno kay Trespeces nga kulang ang manpower sang mga nagapanagtag sang food packs rason nga mahinay man ang pagdul-ong sini sa tagsa ka balay.
Kun tani suno sa natungdan, may yara sang team nga nagapanghatag sa tagsa ka zona agud nga mapanghatag gilayon ang food assistance.
Pasado 7:00 subong nga gab-i, wala sa gihapon nakabaton sang ayuda ang pila ka residente sang nasambit nga lugar.
Suno kay alyas Joven, kinahanglan nila ang bugas, sud-an, gatas kag diaper.
Ginpahayag ni Joven nga bangud indi sila makaguwa sa balay, wala sila nakabakal sang ila kinahanglanon.
Mas maayo kun tani suno kay Joven kun makabaton man sila sang ginpromisa sang Iloilo City Government nga isa ka kilo nga karne sang manok kag baboy, bugas, utan, tubig kag hygiene kits.
Kasubong man ang nangin sentimiyento sang isa man ka residente sang Zone 2 nga si Ma. Rocela Tano.
Suno kay Tano, wala siya makabaton sang ginpromisa nga food packs kag bangud nga suludlon ang ila balay, nagakahangawa siya nga indi na mahatagan sang ayuda.
Ginpahayag ni Tano nga daku na nga bulig sa ila ang bisan ano nga bulig nga ila mabaton.
